Chappe Chappe Pe Hai Aafaq Ke Shohra Tera
Charkh e Aflaaq e Wilayat Me Ujala Tera
Rab Ne Kuch Aisa Banaya Hai Sarapa Tera
Wah Kya Martaba Hai Gaus e Bala Tera
Unche Uncho Ke Saro'n Se Qadam A'ala Tera
Gardan e Ahle Wilayat Me Kafe Paa Tera
Saare Aqtaab Ko Maloom Ye Rutba Tera
Arsh Pe Takht Wilayat Ka Hai Paaya Tera
Sar Bhala Kya Koi Jaane Ke Hai Kaisa Tera
Auliya Malte Hain Aankhe Wo Hai Talwa Tera
Kitna Khuddar Bana Phirta Hai Mangta Tera
Lab Hilaye Bina Mil Jaata Hai Sadqa Tera
Qadri Rang Ka Sar Pe Ho Imaama Tera
Kya Dabe Jis Pe Himayat Ka Ho Panja Tera
Sher Ko Khatre Mein Lata Nahi Kutta Tera
Shikme Madar Mein Jo Qur'an Sikhata Hai
Tujhe Kis Tarah Waliyo'n Ka Sardar Banata Hai
Tujhe Mere Rabko Wahi Bhata Hai Jo Bhata Hai
Tujhe Qasme De De Ke Khilata Hai Pilata Hai
Tujhe Pyara Allah Tera Chahne Wala Tera
Koi Usman Sakha Mein Koi Haatim Hai
Koi Muslim Hai Bukhari Hai Koi Haakim Hai
Rab Ke Altaf Se Tu Kamre Bani Haashim Hai
Kyu Na Qasim Ho Ke Tu Ibn e Abi Qasim Hai
Kyu Na Qadir Ho Ke Mukhtar Hai Baba Tera
Roz e Mehshar Wo Shafa'at Ko Pukaare Jaate
Sar Uthaye Bin Wo Pul Se Utaare Jaate
Aur Zaba'n Se Ye Lagate Hue Na'are Jate
Is Nishani Ke Jo Sag Hain Nahi Maare Jate
Hashr Tak Mere Gale Mein Rahe Patta Tera
Koi Kya Puche Bhala Fikr e Raza Ki Tos'ee
Tera Har Misra Qayamat Mein Bane Tera Shafe'e
Karke Tazmeen Likhi Noor Ne Ye Nazme Waqe'e
Fakhr e Aaqa Mein Raza Aur Bhi Ek Nazm e Rafe'e
Chal Likha Laayein Sana Khwan o Mein Chehra Tera
Submit By Faiz Raza
